ប្រតិកម្មធ្លាក់ព្រោងព្រាត ទីផ្សារហិរញ្ញវត្ថុអាស៊ី អឺរ៉ុប អាមេរិកចាប់ជ្រួលច្របល់ នៅបន្ទាប់ពីប្រធានាធិបតីអាមេរិក លោកដូណាល់ ត្រាំ កាលពីថ្ងៃពុធទី ២មេសា ប្រកាសដំឡើងពន្ធលើទំនិញនាំចូលទឹកដីអាមេរិក។ ពីទ្វីបអាស៊ី ទៅអឺរ៉ុប អាមេរិកខាងត្បូង និងអូស្រ្តាលី ប្រទេសជាង១០០ក្នុងពិភពលោក ជាប់ក្នុងបញ្ជីបង់ពន្ធរបស់លោកដូណាល់ ត្រាំ យ៉ាងតិច១០% និងខ្ពស់បំផុត ។ ដោយប្រកាសសង្រ្គាមពាណិជ្ជកម្មជាមួយគ្រប់គ្នាក្នុងពិភពលោក ប្រធានាធិបតីអាមេរិកបានថ្លែងចាត់ទុកថ្ងៃដំឡើងពន្ធវាយបកវិញថា ជាថ្ងៃរំដោះ របស់សហរដ្ឋអាមេរិកដែលត្រូវប្រទេសដទៃ មិនថា សម្ព័ន្ធមិត្ត ឬប្រទេសគូប្រជែង តែងយកប្រៀប កេងចំណេញរហូតមក។
ចំពោះលោកដូណាល់ ត្រាំ អាមេរិកបានក្លាយជាប្រទេសរងគ្រោះនៅពេលនិយាយពីការដោះដូរពាណិជ្ជកម្មជាមួយប្រទេសដទៃ។ នៅចំពោះមុខមន្រ្តីរដ្ឋាភិបាលរបស់លោក និងកម្មកររោងចក្រផលិតរថយន្តDetroit នៅសេតវិមានកាលពីថ្ងៃពុធទី ២ មេសា លោកដូណាល់ ត្រាំបាននិយាយថា អស់ជាច្រើនទសវត្សរ៍ អាមេរិកត្រូវបានគេលួច ឆក់ប្លន់ បំផ្លាញ និងរំលោភ មិនថា ពីសំណាក់ប្រទេសជិតខាង ប្រទេសសម្ព័ន្ធមិត្ត ឬគូសត្រូវ។ ដោយចាត់ទុក ឱនភាពពាណិជ្ជកម្មមិនត្រឹមតែជាបញ្ហាសេដ្ឋកិច្ច ប៉ុន្តែ វាកិច្ចការជាតិបន្ទាន់ លោកដូណាល់ ត្រាំបាននិយាយថា ដល់វេលាហើយ ដែលអាមេរិកត្រូវប្រកាសឯករាជ្យ តាមរយៈការដំឡើងពន្ធជាទូទៅលើទំនិញនាំចូលមកពីគ្រប់ប្រទេស ដែលលោកចាត់ទុកថា បានកេងយកចំណេញពីអាមេរិករហូតមក។
លោកដូណាល់ ត្រាំបានចាត់ទុកថ្ងៃប្រកាសពន្ធលើទំនិញនាំចូលមកពីគ្រប់ប្រទេសនៅក្នុងពិភពលោក ថា ជាថ្ងៃរំដោះ ដែលឈានទៅជំរុញឲ្យមូលដ្ឋានឧស្សាហកម្មអាមេរិកកកើតឡើងវិញ។
គ្មានប្រទេសណារួចខ្លួនពីរបាំងពន្ធគយរបស់លោកដូណាល់ ត្រាំ
ទៅតាមក្រិត្យប្រធានាធិបតីស្តីពីការដំឡើងពន្ធលើគ្រប់ទំនិញនាំចូលអាមេរិកដែលលោកដូណាល់ ត្រាំបានចុះហត្ថលេខាភ្លាមៗកាលពីថ្ងៃពុធទី ២មេសា មានប្រទេស និងដែនដីចំនួន១៨០នៅក្នុងពិភពលោកដែលជាប់នៅក្នុងបញ្ជីយកពន្ធវាយបក របស់លោកដូណាល់ ត្រាំ។ ពីអាស៊ី ដល់អឺរ៉ុប អាហ្វ្រិកដល់អូស្ត្រាលី សុទ្ធតែជាប់ពន្ធរបស់លោកដូណាល់ ត្រាំ យ៉ាងតិច ១០%ឡើងទៅ។ ការអនុវត្តពន្ធ១០%នឹងត្រូវចាប់ពីថ្ងៃសៅរ៍ទី ៥មេសា ចំណែកពន្ធធ្ងន់ៗចាប់ពី១០%ឡើងទៅ នឹងត្រូវចូលជាធរមានចាប់ពីថ្ងៃទី ៩មេសា។
ចិនត្រូវជាប់ពន្ធ៣៤% អឺរ៉ុប ២០% ចំណែក អ៊ីស្រាអែលវិញ ដែលជាសម្ព័ន្ធមិត្តរបស់អាមេរិកក៏ត្រូវជាប់ក្នុងបញ្ជីដំឡើងពន្ធថ្មី ចំនួន១៧%។ ទំនិញតៃវ៉ាន់វិញត្រូវប្រឈមនឹងការបង់ពន្ធ៣២%។ ប៉ុន្តែ ជាការកត់សំគាល់ ប្រទេសមួយចំនួនដែលស្ថិតនៅក្នុងចំណោមបណ្តាប្រទេសក្រីក្រ ក៏ជាប់ពន្ធយ៉ាងធ្ងន់ក មិនធ្លាប់មានរបស់អាមេរិក ដូចជាកម្ពុជា ដល់ទៅ៤៩% វៀតណាម ៤៦% ថៃ ៣៧%។
រដ្ឋបាលលោកដូណាល់ ត្រាំវាយតម្លៃថា ការដំឡើងពន្ធថ្មី ឬពន្ធវាយបកនេះ មិនត្រឹមធ្វើឲ្យអាមេរិកទទួលយុត្តិធម៌ ដោយលែងចាញ់ប្រៀបដូចមុន ប៉ុន្តែ វានឹងធ្វើឲ្យអាមេរិករកបានប្រាក់ចំណូល ៦០០ពាន់លានដុល្លារក្នុងមួយឆ្នាំៗ។ ចំពោះរដ្ឋបាលត្រាំ ការដំឡើងពន្ធលើទំនិញ មកពីគ្រប់ប្រទេសមិនត្រឹមតែផ្តល់ប្រាក់ចំណូល ដើម្បីយកទៅប៉ះប៉ូវ ទប់ទល់ប្រាក់ចំណូលជាតិដែលអាចធា្លក់ចុះ ដោយសារការកាត់បន្ថយពន្ធលើប្រាក់ចំណូលរបស់ប្រជាជនអាមេរិកតែប៉ុណ្ណោះទេ ប៉ុន្តែ ការដំឡើងពន្ធលើទំនិញនាំចូលអាមេរិកនឹងលើកទឹកចិត្តឲ្យក្រុមហ៊ុនបរទេសចូលមកវិនិយោគនៅទឹកដីអាមេរិក បើសិនគេមិនចង់ជាប់ពន្ធរបស់អាមេរិក។ ដោយប្រើមធ្យោបាយដាក់សម្ពាធតាមរយៈការដំឡើងពន្ធលើទំនិញនាំចូលពីគ្រប់ប្រទេស លោកដូណាល់ ត្រាំមានគោលដៅ ជំរុញរោងចក្រឧស្សាហកម្មក្នុងស្រុក ដែលនឹងបង្កើតការងារធ្វើសម្រាប់ប្រជាជនអាមេរិក។
ប្រតិកម្មព្រោងព្រាតរបស់សម្ព័ន្ធមិត្ត ប៉ុន្តែ ម្នាក់ៗមិនចង់ផ្ទុះសង្រ្គាមពាណិជ្ជកម្មជាមួយអាមេរិក
ពន្ធវាយបករបស់អាមេរិក មិនយុត្តិធម៌ គ្មានមូលដ្ឋានគ្រឹះច្បាស់លាស់ និងបំផ្លាញសណ្តាប់ធ្នាប់ពាណិជ្ជកម្មពិភពលោកដែលផ្អែកលើសេរីភាពធ្វើពាណិជ្ជកម្ម។ នេះជាប្រតិកម្មរបស់បណ្តាប្រទេសដែលជាប់ពន្ធថ្មីរបស់រដ្ឋបាលលោកដូណាល់ ត្រាំ។
អឺរ៉ុប និងសម្ព័ន្ធមិត្តអាស៊ីរបស់អាមេរិក ដូចជាកូរ៉េខាងត្បូង និងជប៉ុនដែលប្រតិកម្មមិនសប្បាយចិត្ត និងសោកស្តាយដែលឃើញប្រធានាធិបតីអាមេរិកដាក់ពន្ធ ដោយមិនលើកលែង។ ប៉ុន្តែ យ៉ាងណាក៏ដោយ អឺរ៉ុប អង់គ្លេស ជប៉ុន បង្ហាញភាពអត់ធ្មត់ ដោយចង់ជ្រើសរើសផ្លូវចរចា រកផ្លូវបន្ធូរបន្ថយពន្ធជាមួយរដ្ឋបាលលោកដូណាល់ ត្រាំ ជាជាងការប្រកាសសង្រ្គាមពាណិជ្ជកម្មជាមួយអាមេរិក ដែលនឹងអាចផ្តល់ផលអវិជ្ជមាន ខាតទាំងអស់គ្នា។ ម្យ៉ាងរដ្ឋមន្រ្តីសេដ្ឋកិច្ចអាមេរិក លោកបានព្រមានរួចហើយ កុំឲ្យប្រទេសដទៃដំឡើងពន្ធសងសឹកវិញ ព្រោះថា អាមេរិកនឹងរឹតតែចាត់វិធានការឆ្លើយតបវិញយ៉ាងចាស់ដៃ។ នៅក្នុងដំណាក់កាលនេះ រដ្ឋមន្រ្តីអាមេរិកទាមទារឲ្យគេព្រមទទួលយក និងត្រូវចរចាទ្វេភាគី មួយទល់មួយ ដើម្បីដោះស្រាយវិវាទពាណិជ្ជកម្ម ទៅតាមករណីប្រទេសនីមួយៗ។
នៅថ្ងៃពុធ មានតែប្រទេសមួយចំនួនតូចដែលប្រកាសសងសឹកវាយបកនឹងការដំឡើងពន្ធរបស់អាមេរិក ដូចជាប្រេស៊ីលជាដើមដែលទើបបានបោះឆ្នោតអនុម័តឲ្យរដ្ឋាភិបាលត្រៀមវិធានវាយបកនឹងការដំឡើងពន្ធ១០%ដែលអាមេរិកដាក់លើប្រេស៊ីល។
ចិនជាផ្ទាំងស៊ីបធំរបស់លោកដូណាល់ ត្រាំ
នៅពេលនិយាយពីភាពមិនស្មើគ្នានៅក្នុងជញ្ជីងពាណិជ្ជកម្ម លោកដូណាល់ ត្រាំមានពាក្យពិសេសនិយាយពីប្រទេសចិន។ លោកត្រាំនិយាយថា លោកគោរពប្រធានាធិបតី ស៊ី ជីនពីង និងប្រទេសចិន ប៉ុន្តែ ចិនបានកេងយកប្រយោជន៍ពីអាមេរិក។ ដោយចង្អុរចោទចិនថា យកពន្ធដល់ទៅ៦៧% លើទំនិញអាមេរិកនាំចូលទៅចិន (ការគន់គណនារបស់សេតវិមាន) លោកដូណាល់បាននិយាយថា លោកនឹងដំឡើងពន្ធវាយបកវិញ ៤៣%។ ចិនជាប់ពន្ធធ្ងន់ជាងគេរបស់លោកដូណាល់ត្រាំ ព្រោះថា បើបូកសរុបជាមួយរនាំងពន្ធគយ ២០% កាលពីខែមីនា ចិនត្រូវបង់ពន្ធលើទំនិញរបស់ខ្លួននាំចូលទៅអាមេរិកដល់ ៥៤%។
យោងតាមទិន្នន័យពាណិជ្ជកម្មចិន ជាង១៦%នៃទំនិញរបស់ចិនដែលមានតម្លៃ៥០០ពាន់លានដុល្លារ ត្រូវបាននាំចូលទៅសហរដ្ឋអាមេរិក។ តាមអ្នកជំនាញ ការដំឡើងពន្ធវាយបករបស់លោកដូណាល់ ត្រាំ មានគោលដៅដាក់គំនាបលើសេដ្ឋកិច្ចចិន ព្រោះថា ប្រទេសតូចៗមួយចំនួន ដូចជា កម្ពុជា វៀតណាម និងប្រទេសនៅអាស៊ីមួយចំនួនទៀត ដែលជាទីតាំងវិនិយោគរបស់ចិននៅក្រៅប្រទេស ក៏ត្រូវជាប់ពន្ធធ្ងន់ៗរបស់លោកដូណាល់ ត្រាំនៅអាណត្តិថ្មីនេះ។ដើម្បីគេចរបាំងពន្ធគយរបស់អាមេរិកទៅលើចិនកន្លងមក
ចិន បានចោទអាមេរិកថា កំពុងដើរធ្វើបាបប្រទេសដទៃតាមរយៈការដំឡើងពន្ធលើទំនិញនាំចូលទៅអាមេរិក។ ប៉ុន្តែ ផ្ទុយពីការប្រកាសដំឡើងពន្ធសងសឹកនៅគ្រាដំឡើងពន្ធ លើកមុន ចិនបានអំពាវនាវឲ្យអាមេរិកប្តូរជំហរនិងលុបចោលរបាំងពន្ធគយថ្មីដែលចិនយល់ថា នឹងមិនធ្វើឲ្យអ្នកណាម្នាក់ឈ្នះទេ គឺមានតែអ្នកចាញ់។
៣ គ្រប់ប្រទេសសុទ្ធតែជាប់បញ្ជីដំឡើងពន្ធវាយកបករបស់លោកដូណាល់ ត្រាំ
តាមតារាងឈ្មោះប្រទេសដែលលោកដូណាល់ ត្រាំបង្ហាញកាលពីថ្ងៃពុធ មានប្រទេស និងដែនដី ដល់ទៅ ១៨០ក្នុងពិភពលោកជាប់ក្នុងបញ្ជីរនាំងពន្ធគយរបស់អាមេរិក។ នៅក្នុងចំណោមនោះ ប្រទេសជាង៦០ ត្រូវបង់ពន្ធខ្ពស់ ច្រើនជាង១០%។ ប៉ុន្តែ ជាការកត់សំគាល់មានប្រទេសមួយចំនួន ដែលគ្មានឈ្មោះ នៅក្នុងតារាងរបស់សេតវិមាន នោះគឺកាណាដា ម៉ិកស៊ិក និងរុស្ស៊ីជាដើម។ គ្មានឈ្មោះ មិនមែនមានន័យថា រួចខ្លួនទេ។ ម៉ិកស៊ិក និងកាណាដា ប្រទេសជិតខាងរបស់អាមេរិកកំពុងជាប់ពន្ធ២៥%របស់លោកត្រាំ តាំងពីខែមីនាម្ល៉េះ។ ចំណែករុស្ស៊ីវិញ ស្ថិតនៅក្នុងបញ្ជីក្រុមប្រទេសដែលអាមេរិកដាក់ទណ្ឌកម្មសេដ្ឋកិច្ច ពោលគឺមិនធ្វើពាណិជ្ជកម្មជាមួយ ដូចជា បេឡារុស កូរ៉េខាងជើង និងគុយបាជាដើម។
ការដំឡើងពន្ធជាទូទៅរបស់រដ្ឋបាល ត្រាំនឹងបង្កផលប៉ះពាល់ដល់សណ្តាប់ធ្នាប់សេដ្ឋកិច្ចពិភពលោក
ដោយដំឡើងពន្ធជាទូទៅ មិនធ្លាប់មាន និងធ្ងន់ធ្ងរ ដោយគ្មានការលើកលែងសូម្បីប្រទេសតូចតាច ក្រីក្រ ឬដែនកោះ រដ្ឋបាលត្រាំប្រកាសសង្រ្គាមពាណិជ្ជកម្មជាមួយពិភពលោក។ សង្រ្គាមពាណិជ្ជកម្មរបស់លោកដូណាល់ ត្រាំជាមួយពិភពលោកទាំងមូលនឹងធ្វើឲ្យសណ្តាប់ធ្នាប់ពិភពលោកត្រូវក្រឡាប់ចាក់។ អ្នកជំនាញវាយតម្លៃថា សេដ្ឋកិច្ចពិភពលោកនឹងអាចដើរថយក្រោយ ដោយសារតែនយោបាយរនាំងពន្ធគយរបស់លោកដូណាល់ ត្រាំ។ គ្រប់ប្រទេសនឹងជួបវិបត្តិសេដ្ឋកិច្ច អតិផរណា ទំនិញឡើងថ្លៃ ការនាំចេញធ្លាក់ចុះ ការបាត់ការងារធ្វើ។ សមាជិកព្រឹទ្ធសភាអាមេរិកមកពីគណបក្សប្រជាធិបតេយ្យវិញបានវាយតម្លៃថា នយោបាយដំឡើងពន្ធរបស់លោកដូណាល់ ត្រាំនឹងធ្វើឲ្យប្រជាជនអាមេរិកជីវភាពមធ្យម ត្រូវចំណាយប្រាក់៥ពាន់ដុល្លារបន្ថែមទៀតដើម្បីបង្រ្គប់ជីវភាពរស់នៅប្រចាំថ្ងៃ។
.png)
0 Comments