អាយ៉ាតូឡា អាលី ខាមីណី មគុទេសន៍ដឹកនាំសាសនាកំពូលរបស់អ៊ីរ៉ង់ បានប្រកាសកាលពីថ្ងៃចន្ទ ទី៣១មីនាថា អ៊ីរ៉ង់នឹងវាយប្រហារតបវិញយ៉ាងម៉ឺងម៉ាត់បំផុត ប្រសិនបើអ៊ីរ៉ង់ត្រូវរងការបាញ់ទំលាក់គ្រាប់បែកលើ។ ទោះមិនបញ្ចេញឈ្មោះឲ្យចំ តែសំដីរបស់មេដឹកនាំកំពូលអ៊ីរ៉ង់នេះ គឺជាការឆ្លើយតបទៅនឹងសំដីគំរាមរបស់លោកដូណាល់ ត្រាំ ដែលបានប្រកាសកាលពីថ្ងៃអាទិត្យថា អាមេរិកនឹងបាញ់ទំលាក់គ្រាប់បែកលើអ៊ីរ៉ង់ ប្រសិនបើអ៊ីរ៉ង់មិនចុះកិច្ចព្រមព្រៀងនុយក្លេអ៊ែរជាមួយអាមេរិកទេនោះ។
នៅក្នុងសុន្ទរកថាបិទបញ្ចប់បុណ្យបួសរ៉ាម៉ាដន់ កាលពីថ្ងៃចន្ទទី៣១មីនា អាយ៉ាតូឡា អាលី ខាមីណី មគុទេសន៍សាសនាកំពូលរបស់អ៊ីរ៉ង់ បានថ្លែងថា ប្រសិនបើមានការវាយប្រហារ បាញ់ទម្លាក់គ្រាប់បែក មកលើអ៊ីរ៉ង់មែន នោះអ៊ីរ៉ង់នឹងឆ្លើយតបវិញយ៉ាងម៉ឺងម៉ាត់ ឲ្យសក្តិសមបំផុត។
គួរកត់សំគាល់ថា សម្តីរបស់អាយ៉ាតូឡា អាលី ខាមីណី នេះ គឺមិនបញ្ចេញឈ្មោះឲ្យចំថានរណាជាអ្នកគំរាមអ៊ីរ៉ង់ទេ។ ក៏ប៉ុន្តែ គេអាចដឹងយ៉ាងច្បាស់ ថាមេដឹកនាំកំពូលអ៊ីរ៉ង់រូបនេះ បានឆ្លើយតបទៅនឹងសំដីគំរាមរបស់លោកដូណាល់ ត្រាំ។ នៅក្នុងបទសម្ភាសន៍មួយ ឲ្យទូរទស្សន៍ NBC កាលពីថ្ងៃអាទិត្យ លោកដូណាល់ ត្រាំ បានលើកឡើងថា ប្រសិនបើដំណើរការចរចាការទូត ស្តីពីកម្មវិធីនុយក្លេអ៊ែរអ៊ីរ៉ង់ ជួបបរាជ័យ នោះអាមេរិកអាចនឹងបើកការវាយប្រហារ បាញ់ទំលាក់គ្រាប់បែកទៅលើអ៊ីរ៉ង់។ លោកត្រាំ បានគូសបញ្ជាក់ម្តងហើយម្តងទៀត ថាបើអ៊ីរ៉ង់នៅតែរឹងរូស មិនចុះកិច្ចព្រមព្រៀងទេ អាមេរិកនឹងបាញ់គ្រាប់បែកកម្ទេចអ៊ីរ៉ង់។
សូមបញ្ជាក់ថា ក្រោយសំដីគំរាមដោយចំហរបស់លោកដូណាល់ ត្រាំ នេះ អ៊ីរ៉ង់បានបង្ហាញការមិនសុខចិត្ត ដោយបានកោះឲ្យចូលជួប ទទួលបានការបំភ្លឺ ពីសំណាក់លោកអគ្គរដ្ឋទូតស្វីសប្រចាំនៅក្រុងតេអេរ៉ង់ ដែលជាអ្នកជំនួសមុខឲ្យសហរដ្ឋអាមេរិក នៅក្នុងទំនាក់ទំនងជាមួយអ៊ីរ៉ង់។ លោក Esmaïl Baghaï អ្នកនាំពាក្យក្រសួងការបរទេសអ៊ីរ៉ង់បានបង្ហោះសារតាមបណ្តាញសង្គម X ថា ការដែលមេដឹកនាំប្រទេសមួយ ហ៊ានប្រើសំដីគំរាមដោយចំហ ថានឹងទំលាក់គ្រាប់បែកមកលើអ៊ីរ៉ង់ វាគឺជាការបំពានជាន់ឈ្លីដោយព្រហើនបំផុត មកលើសន្តិភាពនិងសន្តិសុខអន្តរជាតិ។
ដោយឡែក លោក Amir ali Hajizadeh អគ្គមេបញ្ជាការកងកម្លាំងអាកាស នៃកងទ័ពឆ្មាំបដិវត្តអ៊ីរ៉ង់ បាននិយាយថា នៅតំបន់ជុំវិញអ៊ីរ៉ង់ គឺអាមេរិកមានមូលដ្ឋានទ័ពដល់ទៅ១០ ហើយដែលមានទាហានអាមេរិកប្រចាំការ ចំនួន៥០០០០នាក់។ មេទ័ពអ៊ីរ៉ង់រូបនេះ ចង់បានន័យថា អ៊ីរ៉ង់អាចវាយប្រហារទៅលើមូលដ្ឋានទ័ពអាមេរិក ដែលស្ថិតនៅជុំវិញអ៊ីរ៉ង់ ដើម្បីជាការសងសិកវិញ ក្នុងករណីដែលអាមេរិកវាយប្រហារមកលើអ៊ីរ៉ង់។
សូមរំលឹកថា អ៊ីរ៉ង់បានចុះកិច្ចព្រមព្រៀងគ្រប់គ្រងកម្មវិធីនុយក្លេអ៊ែរ នៅឆ្នាំ២០១៥ ជាមួយប្រទេសសមាជិកទាំង៥ក្រុមប្រឹក្សាអចិន្ត្រៃយ៍អង្គការសហប្រជាជាតិ។ ក៏ប៉ុន្តែគឺលោកដូណាល់ ត្រាំ ដែលបានដកខ្លួនសហរដ្ឋអាមេរិកចេញ ពីកិច្ចព្រមព្រៀងនេះនៅឆ្នាំ២០១៨ នឹងបានដាក់ទណ្ឌកម្មសេដ្ឋកិច្ចមកលើអ៊ីរ៉ង់ឡើងវិញ។ គ្មានសហរដ្ឋអាមេរិក កិច្ចព្រមព្រៀងនេះ បានសាបសូន្យឥតន័យ ហើយបានធ្វើឲ្យអ៊ីរ៉ង់ពន្លឿនកម្មវិធីនុយក្លេអ៊ែររបស់ខ្លួនយ៉ាងលឿនរហ័ស ដែលធ្វើឲ្យសហគមអន្តរជាតិភ័យបារម្ភ ថាអ៊ីរ៉ង់អាចនឹងមានអាវុធនុយក្លេអ៊ែរក្នុងពេលឆាប់ៗ។
បន្ទាប់ពីបានត្រលប់មកកាន់អំណាចវិញ លោកដូណាល់ ត្រាំ បានប្រកាសបើកច្រកផ្លូវដើម្បីចរចាការទូតដោយផ្ទាល់ជាមួយអ៊ីរ៉ង់ និងបានផ្ញើលិខិតមួយទៅកាន់ថ្នាក់ដឹកនាំអ៊ីរ៉ង់ថែមទៀតផង។ តែជាមួយគ្នានេះ រដ្ឋបាលលោកដូណាល់ ត្រាំ បានបន្តប្រើប្រាស់យន្តការដាក់សំពាធសង្កត់កអ៊ីរ៉ង់ តាមរយៈការដាក់ទណ្ឌកម្មបិទផ្លូវឲ្យកុំឲ្យអ៊ីរ៉ង់អាចលក់ប្រេងនៅក្រៅប្រទេស។ កាលពីថ្ងៃព្រហស្បតិ៍ទី ២៧មីនា ភាគីអ៊ីរ៉ង់បានបញ្ជាក់ គេក៏បានផ្ញើលិខិតឆ្លើយតបទៅវិញរួចហើយ តាមរយៈប្រទេសអូម៉ង់ដែលជាអ្នកនាំសារ។ នៅថ្ងៃអាទិត្យ ភ្លាមៗក្រោយសំដីគំរាមរបស់លោកដូណាល់ ត្រាំ លោកប្រធានាធិបតីអ៊ីរ៉ង់ Massoud Pezeshkian បានបញ្ជាក់ថាថ្មីម្តងទៀត ថាអ៊ីរ៉ង់បដិសេធមិនចរចាដោយផ្ទាល់ជាមួយសហរដ្ឋអាមេរិកទេ ប្រសិនបើអាមេរិកនៅតែគំរាមផងសំឡុតផងបែបនេះ។ តែជាមួយគ្នានេះ អ៊ីរ៉ង់បើកផ្លូវឲ្យមានការនិយាយគ្នាដោយប្រយោល តាមរយៈប្រទេសអាជ្ញាកណ្តាលណាមួយ៕
.png)
0 Comments